پریس ریلیزز

(اسلام آباد: 30 اگست، 2023): پاکستان ٹیلی کمیونیکیشن اتھارٹی (پی ٹی اے) نے اسلام آباد، پنجاب، خیبر پختونخو ا ہ، سندھ اور بلوچستان کے 19 شہروں میں موبائل فون آپریٹروں (سی ایم اوز) کی جانب سے صارفین کو فراہم کردہ سروسز کی کارکردگی اور خدمات کے معیار کو جانچنے کے لئے ایک آزاد کیو او ایس (کوالٹی آف سروس) سروے کیا۔

سروے کے دوران نیکسٹ جنریشن موبائل سروس لائسنس (این جی ایم ایس) اور موبائل فون نیٹ ورک کوالٹی آف سروس (کیو او ایس)ریگولیشن 2021 میں درج کے پی آئیزکو جدید ترین خودکار کوالٹی آف سروس مانیٹرنگ اور بینچ مارکنگ ٹول کے استعمال کے ذریعے چیک کیا گیا۔ چیک شدہ کے پی آئیزآواز، نیٹ ورک کوریج، ایس ایم ایس اور موبائل براڈ بینڈ/ڈیٹا سروسز سے متعلق ہیں۔ ڈرائیو ٹیسٹ ٹیموں نے سروے کے راستوں کا انتخاب اس طرح کیا تاکہ سروے شدہ علاقوں میں مین روڈز، سروس روڈز اور زیادہ تر سیکٹرز/کالونیوں کو شامل کیا جا سکے۔ متعلقہ لائسنسوں اور کیو او ایس ضوابط میں متعین حد کے مطابق ہر کے پی آئی کی تعمیل کی بنیاد پر سروے شدہ شہروں میں موبائل فون آپریٹروں کو موبائل نیٹ ورک کوریج اور وائس سروسز میں 1 سے 4 تک پوزیشن دی گئی۔ اسی طرح، موبائل براڈ بینڈ سپیڈ سیگمنٹ میں، درجہ بندی سب سے زیادہ ڈیٹا ڈاؤن لوڈ اور اپ لوڈ کی رفتار، نیٹ ورک لیٹنسی اور ویب پیج لوڈنگ کے ٹائم کے مطابق کی گئی ہے۔ 

سروے کے نتائج سے یہ بات سامنے آتی ہے کہ موبائل فون آپریٹروں کی جانب سے اپ لوڈ نگ اور ڈاؤن لوڈنگ کی رفتار کے حوالے سے کافی حد تک تعمیل کی گئی ہے جبکہ گزشتہ سروے کے مقابلے میں نیٹ ورک میں تاخیر اور ویب پیج لوڈنگ کے وقت میں بھی کافی بہتری پائی گئی۔مزید برآں کچھ وائس کے پی آئیز بھی کچھ علاقوں میں لائسنس تھریش ہولڈ سے کم پائے گئے ہیں۔ بالآخر، آپریٹرز کو اصلاحی اقدامات کے حوالے سے ضروری ہدایات جاری کر دی گئی ہیں تاکہ لائسنس کے معیارات کے مطابق سروس میں بہتری کو یقینی بنایا جا سکے۔ سروے کے مکمل نتائج سبسکرائبرز کی معلومات کے لیے پی ٹی اے کی ویب سائٹ(https://pta.gov.pk/en/consumer-support/qos-survey/qos-survey). پرملاحظہ کئے جا سکتے ہیں۔سروس کے معیار کی جانچ پڑتال سروے پر مامور پی ٹی اے کی فیلڈ ٹیموں کے ذریعے انجام دی جا تی رہی ہے جس کامقصد آپریٹروں کوموبائل خدمات معیاری فراہمی اور ان کے مابین صحت مند مقابلے کی فضاء قائم کرنا ہے۔